MSHMS urdhër për reduktimin e operacioneve në spitale

Përmes një statusi në facebook eksperti i shëndetësisë, Gazment Koduzi i ka drejtuar disa pyetje Ministrisë së Shëndetësisë dhe Mbrotjes Sociale lidhur me reduktimin e operacioneve në spitale. Prof. Koduzi e lidh këtë urdhër të MSHMS (për reduktimin e operacioneve) me koncesionin e sterilizimit.

 “Ka disa ditë që në gjithë vendin me urdhër të Ministrisë është reduktuar numri i operacioneve. Arsyeja? Koncesioni abuziv dhe korruptiv i sterilizimit. Pse nuk bëhet publik urdhëri që shqiptarët ta dinë arsyen e pritjes në radhë për një operacion? Apo ashtu është një muhabet miliona euro”?, shkruan Koduzi në rrjete sociale.

Procedura e koncesionit 10 vjeçar me vlerë 9.6 miliardë lekë është hapur në 13 shkurt 2015, me një vendim të ministrit Ilir Beqaj.

Objekti i kontratës së partneritetit publik-privat ka për qëllim ofrimin e setit të personalizuar të instrumenteve kirurgjikalë sterilë, furnizimin me material mjekësor steril njëpërdorimësh në sallat kirurgjikale, trajtimin e mbetjeve me rrezik biologjik dhe dezinfektimin e sallave kirurgjikale dhe ambienteve.

Ky shërbim ofrohet në spitalet universitare dhe rajonale të vendit, apo dhe spitale të tjera, sipas planit të racionalizimit spitalor në Republikën e Shqipërisë.

Megjithëse qeveria vazhdon të firmosë dhe tu hapë dritën jeshile koncesioneve në sektorin e shëndetësisë, ka shumë pak transparencë ndaj tyre dhe analizat e kosto-përfitimeve mungojnë. Por të dhëna të fragmentuara që burojnë nga dokumente zyrtare tregojnë se koncesionet po rezultojnë me kosto shumë herë më të larta se përfitimet.