PRO PACIENTIT Synon mbrojtjen dhe promovimin e të drejtave të pacientëve
Zyra e Komisionerit për të Drejtën e Informimit dhe Mbrojtjen e të Dhënave Personale, në bashkëpunim me Prezencën e OSBE në Shqipëri, organizuan aktivitetin me temë “Rregullat në lidhje me mbrojtjen e të dhënave personale në sistemin e kujdesit shëndetësor”. Pjesëmarrës në këtë takim ishin përfaqësues nga institucionet publike dhe subjektet private që ushtrojnë veprimtarinë në sektorin e shëndetësisë.
Z. Besnik Dervishi, në fjalën e tij, theksoi domosdoshmërinë që ka procesi i ndërgjegjësimit të qytetarëve, e nga ana tjetër, funksionimin e një mekanizmi të qëndrueshëm garancish nga operatorët e sistemit. “Shëndetësia është një nga fushat më të rëndësishme për sa i përket mbrojtjes së të dhënave personale, për numrin e madh të përpunimit të tyre, por edhe natyrën sensitive të këtyre të dhënave. Zyra e Komisionerit e ka në vëmendje këtë sektor, duke nxitur investimin në burime njerëzore të kualifikuara dhe në sisteme që garantojnë sigurinë e të dhënave personale” – vlerësoi Komisioneri.
“Kemi zhvilluar në dy vitet e fundit 300 hetime administrative, 40 prej të cilave janë të përqendruara në sektorin e shëndetësisë. Ka pasur shkelje të karakterit: Dosje shëndetësore të pacientit, të dhënat që gjendet në institucionin publik gjendjen papritur në një spital privat
“Mund t’ju ketë ndodhur që pasi keni bërë një vizitë mjekësore në sistemin publik t’ju kenë telefonuar nga ndonjë klinikë private me të cilën ju nuk keni kontaktuar herë tjetër dhe çuditërisht ata kanë siguruar jo vetëm numrin tuaj të telefonit, por dhe për çfarë shkoni ju më shpesh tek mjeku. Ne këtë mënyrë ju ofrojnë të shkoni në atë klinikë ku mund të përfitoni edhe ndonjë ekzaminim falas. E kjo, është shkelje e hapur e privatësisë apo mos ruajtjes së të dhënave personale, e cila është një e drejtë themelore e pacientit”, deklaroi ai.
Takimin e përshëndeti znj. Bardhylka Kospiri, zëvendësministër i Shëndetësisë dhe Mbrojtjes Sociale, e cila tha se bashkëpunimi me Zyrën e Komisionerit është i vazhdueshëm për ta përmirësuar gjithnjë e më shumë sistemin edhe në këtë aspekt. Në fjalën e tij, z. Emir Kamenica, tha se Prezenca e OSBE do të mbështesë nisma të kësaj natyre për garantimin e të drejtave të njeriut. Ndërsa, z. Fatmir Brahimaj, President i Urdhrit të Mjekëve e vlerësoi si në momentin dhe me tematikën e duhur këtë takim.
Znj. Pjerina Gaxha, Drejtori i Drejtorisë për Mbrojtjen e të Dhënave Personale, mbajti një prezantim për të pranishmit, ku i njohu me ligjin nr. 9887/2008 “Për mbrojtjen e të dhënave personale”, me aktet nënligjore të fushës, si dhe trajtimin e rasteve konkrete. Në këtë trajnim i ftuar ishte eksperti i njohur ndërkombëtar i fushës, z. Angelo Trapana’, President i Unionit Kombëtar të Organizmave të Akredituar në Romë. Nëpërmjet eksperiencës italiane dhe më gjerë, prezantimi i tij trajtoi procesin e certifikimit të institucioneve/kontrolluesve të sistemit shëndetësor./ D.C