PRO PACIENTIT Synon mbrojtjen dhe promovimin e të drejtave të pacientëve
Me gjithë dhimbjen e madhe për humbjen e vajzës dhe nuses së tyre, dy familje nga Prishtina kanë gjetur forcën dhe kurajën të falënderojnë dhe t’u jenë mirënjohës mjekëve të Spitalit Ushtarak për kujdesin që ata kanë kushtuar ndaj 37-vjeçares Fatmire Maloku.
Ata janë falënderues ndaj mjekëve jo vetëm për angazhimin e tyre profesional në shpëtimin e gruas, që fatkeqësisht nuk arriti t’i shpëtojë aksidentit të rëndë, por edhe për mikpritjen vëllazërore dhe ngrohtësinë që i kanë dhënë jo vetëm Fatmirës por edhe familjarëve të saj.
Mesazhi është postuar nga rektori i Universitetit të Mjekësisë, Arben Gjata.
“I dashuri profesor Dilaver,
Vajza e jonë Fatmirja 37 vjeçe vdiq në Spitalin Ushtarak të Tiranës, në mëngjesin e ditës e premte,
të datës 7 korrik 2017. Fatmirja e jonë e dashur nuk mundi t’i përballojë lëndimet që i mori në aksident komunikacioni. Megjithatë, familja ime Maloku, por edhe familja Bajgora, ku ishte e martuar Fatmirja, ndjejmë obligim moral të ju falënderojmë juve personalisht, mjekët : Dr.Luan Nikollari, Dr. Ergen Hodaj si dhe kol.Dr.Rushan Muhameti, për angazhimin profesional të nivelit të lartë, por mbi të gjitha, për mikpritjen vëllazërore që iu afrua në rend të parë Fatmirës si dhe njerëzve tanë që qëndronin pranë Fatmirës. Ata , doktorët bën gjithçka nga ana e tyre, por jo vetëm ata, por i gjithë stafi i spitalit. Vajza e jonë Fatmirja, e ndjeu ngrohtësinë e vëllezërve dhe motrave të gjakut të saj, dhe nuk pati as frikë e as nuk i mbeti merak ta kishim drejtuar dikund tjetër, siç na preferonin këtu në Prishtinë, bashkëpunëtorët e shkieve, Beogradin ose Shkupin! Ne ishim të sigurt se askush tjetër nuk t’i shëron plagët sikur doktorët e Nënlokës Shqipëri. Doktorët patën konsideratë, duke e kuptuar drejt se te dy familjet Maloku dhe Bajgora jemi familje skamnore, dhe gjithë këto shërbime për bijën tonë Fatmirën i mbuluan vetë. Po dihet se roli i juaj në këtë rast ishte i veçantë. Prandaj, me gjithë dhimbjen që kemi për Fatmirën tonë, ne ju falënderojmë nga zemra për gjithë atë që ju e bëtë!
Qofshi me shëndet dhe gëzime në familjet e juaja. Po të kishim adresa interneti do t’i falënderonim të gjithë një nga një, por falënderimin po ua përcjellim përmes jush.
Në emër të dy familjeve: Maloku dhe Bajgora, me shumë respekt për Ju, Fazli Maloku- Prishtinë”. / ProPacientit.com