PRO PACIENTIT Synon mbrojtjen dhe promovimin e të drejtave të pacientëve
Shoqata “Together for Life” organizoi sot në Qendrën e hemoglobinopatisë, QSUT, një sesion informues me pacientët dhe të afërmit e tyre. Pjesëmarrësit u informuan me të drejtat e tyre në sistemin shëndetësor, kuadrin ligjor, ku mund t’i drejtojnë ankesat e tyre në rastet e keqmenaxhimit apo keqmjekimit nga ana e përfaqësuesve të sistemit shëndetësor dhe ku mund të marrin zgjidhje për problemet që kanë.
Ky aktivitet u realizua në kuadër të projektit “Forcim i zbatimit të të drejtave të pacientëve përmes advokimit dhe mbrojtjes ligjore”, i cili mbështetet nga Agjencia e Shteteve të Bashkuara për Zhvillim Ndërkombëtar (USAID).
Një problematik që prindërit shtruan ishte mungesa e gjakut gjatë verës. Nëna e një 10-vjeçari tregon se gjatë muajve të verës ka mungesë të theksuar të gjakut dhe janë shumë të shqetësuar se mund të përsëritet i njëjti problem si vitet e kaluara.
“Problemi më madhor është gjatë muajve të verës. Ka mungesë të theksuar të gjakut. Çdo vit është i njëjti problem dhe zgjat deri në nëntor. Ky problem është për të gjitha llojet e grupit të gjakut, jo vetëm për ata me grup 0, që mendohet se është pak më i veçantë. Nuk mund të shkojmë as me pushime se nuk e dimë kur mund të ketë gjak, kur duhet të vijmë për të bërë transfuzionin.
Me ka qëlluar që kam ikur një javë me pushime dhe kur kam ardhur djali ka qenë me hemorragji të lartë vetëm se nuk mori sasinë e duhur. Gjatë muajve të verës nuk dhurojnë as gjak. Jemi ankuar tek Ministria e Shëndetësisë dhe nuk kemi gjetur rrugëzgjidhje. Kërkojmë nga organet kompetente që të bëhet diçka paraprakisht, që të mos na përsëritet i njëjti problem. Dikush duhet të na ndihmojë, sepse neve nuk na hapen as dyert”, shprehet znj. Brunilda.
Të njëjtin problem ngre edhe znj. Mahije, e cila duhet të vijë çdo dy javë nga Librazhdi në Tiranë për të shoqëruar mbesën që të marrë transfuzion gjaku.
“E kam mbesën 12 vjeç. Nëna i ka ndërruar jetë dhe më duhet mua që ta shoqëroj nga Librazhdi në Tiranë që të marrë gjak. Vitet e kaluara, gjatë muajve të verës, ka pasur raste që kemi ardhur deri në Tiranë dhe na kanë thënë që nuk kanë gjak. Jam edhe e moshuar dhe nuk kam fuqi të bëj ecejake me mbesën.
Këto problematika familjarët e të miturve i kanë shprehur gjatë aktivitetit të organizuar nga Shoqata ‘Together for life’ në Qendrën e Hemoglobinopative.
“Shërbimi që merrni është një e drejtë që ju takon, nuk është se jua fal dikush, as mjeku, as Ministria e Shëndetësisë”, u shpreh drejtoresha e shoqatës, znj. Eglantina Bardhi. “Jemi këtu jo vetëm për t’ju informuar mbi të drejtat tuaja si pacient, por edhe për t’u ardhur në ndihmë nga ana ligjore, që të dini ku duhet të drejtoheni për të kërkuar atë që ju takon”, shtoi ajo.
Një shqetësim tjetër që prindërit e fëmijëve me sëmundje gjaku shtruan është sorollatja që iu bëjnë për të marrë ilaçet. Një prind nga Fieri tregon se për të marrë ilaçet duhet të shkojë në Lushnjë, ndërkohë që transfuzionin e gjakut e bëjnë në Tiranë çdo dy javë. Dhe e gjithë kjo rrugë që ata bëjnë nuk rimbursohet fare.
“Kam vajzën 15 vjeç që vuan nga talasemia. Duhet të vijmë çdo dy javë nga Fieri në Tiranë që të marrë gjak. Është në një moshë minorene dhe duhet të ketë patjetër një shoqërues me vete. Mua më duhet të lë punën për ta shoqëruar. Por, përveç ardhjes në Tiranë, duhet të shkojmë edhe në Lushnjë për të marrë ilaçet. Nuk e di përse na e bëjnë këtë sorollatje. T’i marrim ilaçet në Fier ose të paktën kur të vijmë në Tiranë për të bërë transfuzionin e gjakut. E gjithë kjo rrugë që bëhet nuk rimbursohet fare. Të paktën të pajisen fëmijët me kartë invaliditeti që të mund të udhëtojnë pa pagesë. Vajza është në një moshë kur duhet të paguajë për çdo udhëtim që bën. Po të jetë e pajisur me kartë invaliditeti të paktën me urban mund të udhëtojë falas”, shprehet z. Ferdinant.
Ledia Muraku, lektore në këtë aktivitet, shpjegoi të gjithë instrumentet që pacientët mund t’i përdorin për të kërkuar të drejtat e tyre në rast shkeljeje.
“Çdo pacient ka të drejtën për akses në shërbimet shëndetësore, sipas nevojës vetjake shëndetësore. Shërbimet shëndetësore duhet të garantojnë akses të barabartë për këto.
“Pacienti gjithashtu ka të drejtë të marrë kompensim të mjaftueshëm kurdoherë që pëson dëm fizik ose moral, si dhe dëm psikologjik si pasojë e një trajtimi të shërbimit shëndetësor” informoi znj. Muraku.
“Në rast se mendoni se ju janë shkelur të drejtat tuaja nga institucionet që ofrojnë kujdes shëndetësore, secili nga ju mund t’i drejtohet, drejtorisë së QSUT-së përmes një ankese me shkrim, Avokatit të Popullit, Komisionerit për Mbrojtjen nga Diskriminimi (në rast trajtimi të pabarabartë në ofrimin e kujdesit shëndetësore, Prokurorisë së Rrethit (duke denoncuar rastin) dhe shoqatave të shoqërisë civile për të marrë këshillim ligjor”, shtoi ajo.